ہم رنگ لاغری سے ہوں گل کی شمیم کا طوفان باد ہے مجھے جھونکا نسیم کا چھوڑا نہ کچھ بھی سینے میں طغیان اشک نے اپنی ہی فوج ہو گئی لشکر غنیم کا یاران نو کے واسطے مجھ سے خفا ہوئے تم کو نہیں ہے پاس نیاز قدیم کا یاد آئی کافروں کو مری آہ سرد کی کیونکہ نہ کانپنے لگے شعلہ جحیم کا از بس کہ ثبت نامہ ہے سوز تپ دروں قاصد کا ہاتھ ہے ید بیضا کلیم کا واعظ کبھی ہلا نہیں کوئے صنم سے میں کیا جانوں کیا ہے مرتبہ عرش عظیم کا مارا ہے وصل غیر کے شکوے پہ چاہیئے مدفن جدا جدا مری لاش دو نیم کا کہتا ہے بات بات پہ کیوں جان کھا گئے گویا کہ پک گیا ہے کلیجہ ندیم کا واعظ بتوں کو خلد میں لے جائیں گے کہیں ہے وعدہ کافروں سے عذاب الیم کا مومنؔ تجھے تو وہب ہے مومن ہی وہ نہیں جو معتقد نہیں تری طبع سلیم کا

Hum rang-e-laaghari se hun gul ki shameem ka Toofaan-e-baad hai mujhe jhonka-e-naseem ka Chora na kuch bhi seene mein tughyaan-e-ashk ne Apni hi fauj ho gayi lashkar-e-ghaneem ka Yaaraan-e-nau ke waste mujh se khafa hue Tum ko nahin hai paas-e-niyaaz-e-qadeem ka Yaad aayi kaafaron ko meri aah-e-sard ki Kyunke na kaampne lage shola-e-jaheem ka Az bas ke sabt-naama hai soz-e-tap-e-daroon Qaasid ka haath hai yad-e-baiza-e-Kaleem ka Waiz kabhi hila nahin koo-e-sanam se main Kya jaanon kya hai martaba-e-arsh-e-azeem ka Maara hai wasl-e-ghair ke shikwe pe chahiye Madfan juda juda meri laash-e-do-neem ka Kehta hai baat baat pe kyun jaan kha gaye Goya ke pak gaya hai kaleja-e-nadeem ka Waiz buton ko khuld mein le jaayen ge kahin Hai waada kaafaron se azaab-e-aleem ka Momin tujhe to wahb hai momin hi woh nahin Jo muqtaqid nahin teri tab-e-saleem ka

امتحاں کے لیے جفا کب تک التفات ستم نما کب تک غیر ہے بے وفا پہ تم تو کہو ہے ارادہ نباہ کا کب تک جرم معلوم ہے زلیخا کا طعنۂ دست نارسا کب تک مجھ پہ عاشق نہیں ہے کچھ ظالم صبر آخر کرے وفا کب تک دیکھیے خاک میں ملاتی ہے نگہ چشم سرمہ سا کب تک کہیں آنکھیں دکھا چکو مجھ کو جانب غیر دیکھنا کب تک نہ ملائیں گے وہ نہ آئیں گے جوش لبیک و مرحبا کب تک ہوش میں آ تو مجھ میں جان نہیں غفلت جرأت آزما کب تک لے شب وصل غیر بھی کاٹی تو مجھے آزمائے گا کب تک تم کو خو ہو گئی برائی کی درگزر کیجیئے بھلا کب تک مر چلے اب تو اس صنم سے ملیں مومنؔ اندیشۂ خدا کب تک

Imtihaan ke liye jafa kab tak Iltifaat-e-sitam-numa kab tak Ghair hai be-wafa pe tum to kaho Hai iraada-e-nibaah ka kab tak Jurm maaloom hai Zulaikha ka Taana-e-dast-e-narsa kab tak Mujh pe aashiq nahin hai kuch zaalim Sabr aakhir kare wafa kab tak Dekhiye khaak mein milaati hai Nigah-e-chashm-e-surma-sa kab tak Kahin aankhen dikha chuko mujh ko Jaanib-e-ghair dekhna kab tak Na milaain ge woh na aayen ge Josh-e-labbaik-o-marhaba kab tak Hosh mein aa to mujh mein jaan nahin Ghafat-e-jurrat-aazma kab tak Le shab-e-wasl ghair bhi kaati Tu mujhe azmaaye ga kab tak Tum ko khu ho gayi burai ki Darguzar kijiye bhala kab tak Mar chale ab to is sanam se milein Momin andesha-e-Khuda kab tak

دیکھ لو شوق نا تمام مرا غیر لے جائے ہے پیام مرا بے اثر ہے فغان خون آلود کیوں نہ ہوئے خراب کام مرا آتشیں خو سے آرزوئے وصال پک گیا اب خیال خام مرا دیکھنا کثرت بلا نوشی کاسۂ آسماں ہے جام مرا رتبہ افتادگی کا دیکھو ہے عرش کے بھی پرے مقام مرا کس صنم کو چھڑا دیا واعظ لے خدا تجھ سے انتقام مرا ہو کے یوسف جو دل چراتے ہو کون ہو جائے گا غلام مرا اس لب لعل کی شکایت ہے کیونکہ رنگیں نہ ہو کلام مرا تو نے رسوا کیا مجھے اب تک کوئی بھی جانتا تھا نام مرا زانوئے بت پہ جان دی دیکھا مومنؔ انجام و اختتام مرا بندگی کام آ رہی آخر میں نہ کہتا تھا کیوں سلام مرا

dekh lo shauq-e-na-tamam mera ghair le jaaye hai payaam mera be-asar hai faghaan-e-khoon-aalood kyon na huye kharaab kaam mera aatishin khu se aarzu-e-visaal pak gaya ab khayaal-e-khaam mera dekhna kasrat-e-bala-noshi kaasa-e-aasmaan hai jaam mera rutba uftaadagi ka dekho hai arsh ke bhi pare maqaam mera kis sanam ko chhuRa diya waaiz le khuda tujh se intiqaam mera ho ke yusuf jo dil churaate ho kaun ho jaaye ga ghulaam mera is lab-e-laal ki shikayat hai kyonke rangeen na ho kalaam mera tu ne ruswa kiya mujhe ab tak koi bhi jaanta tha naam mera zaanu-e-but pe jaan di dekha momin anjaam o ikhtitaam mera bandagi kaam aa rahi aakhir main na kehta tha kyon salaam mera

اس وسعت کلام سے جی تنگ آ گیا ناصح تو میری جان نہ لے دل گیا گیا ضد سے وہ پھر رقیب کے گھر میں چلا گیا اے رشک میری جان گئی تیرا کیا گیا یہ ضعف ہے تو دم سے بھی کب تک چلا گیا خود رفتگی کے صدمے سے مجھ کو غش آ گیا کیا پوچھتا ہے تلخی الفت میں پند کو ایسی تو لذتیں ہیں کہ تو جان کھا گیا کچھ آنکھ بند ہوتے ہی آنکھیں سی کھل گئیں جی اک بلائے جان تھا اچھا ہوا گیا آنکھیں جو ڈھونڈتی تھیں نگہ ہائے التفات گم ہونا دل کا وہ مری نظروں سے پا گیا بوئے سمن سے شاد تھے اغیار بے تمیز اس گل کو اعتبار نسیم و صبا گیا آہ سحر ہماری فلک سے پھری نہ ہو کیسی ہوا چلی یہ کہ جی سنسنا گیا آتی نہیں بلائے شب غم نگاہ میں کس مہروش کا جلوہ نظر میں سما گیا اے جذب دل نہ تھم کہ نہ ٹھہرا وہ شعلہ رو آیا تو گرم گرم ولیکن جلا گیا مجھ خانماں خراب کا لکھا کہ جان کر وہ نامہ غیر کا مرے گھر میں گرا گیا مہندی ملے گا پاؤں سے دشمن تو آن کر کیوں میرے تفتہ سینے کو ٹھوکر لگا گیا بوسہ صنم کی آنکھ کا لیتے ہی جان دی مومنؔ کو یاد کیا حجر الاسود آ گیا

is wusat-e-kalam se ji tang aa gaya naasih tu meri jaan na le dil gaya gaya zid se wo phir raqib ke ghar mein chala gaya ai rashk meri jaan gayi tera kya gaya ye zoaf hai to dam se bhi kab tak chala gaya khud-raftagi ke sadme se mujh ko ghash aa gaya kya poochhta hai talkhi-e-ulfat mein pand ko aisi to lazzaten hain ke tu jaan kha gaya kuchh aankh band hote hi aankhen si khul gayin ji ek balaa-e-jaan tha achha hua gaya aankhen jo DhoonDti thin nigah-haaye iltifaat gum hona dil ka wo meri nazron se pa gaya boo-e-saman se shaad the aghyaar be-tameez is gul ko aitbaar naseem o saba gaya aah-e-sahar hamaari falak se phiri na ho kaisi hawa chali ye ke ji sansana gaya aati nahin balaa-e-shab-e-gham nigaah mein kis mahroash ka jalwa nazar mein sama gaya ai jazb-e-dil na tham ke na Thehra wo shola-ru aaya to garam garam lekin jala gaya mujh khaanumaan-kharaab ka likha ke jaan kar wo naama ghair ka mere ghar mein gira gaya mehndi mile ga paaon se dushman to aan kar kyon mere tafta seene ko Thokar laga gaya bosa sanam ki aankh ka lete hi jaan di momin ko yaad kya hajar-e-aswad aa gaya

جلتا ہوں ہجر شاہد و یاد شراب میں شوق ثواب نے مجھے ڈالا عذاب میں کہتے ہیں تم کو ہوش نہیں اضطراب میں سارے گلے تمام ہوئے اک جواب میں پھیلی شمیم یار مرے اشک سرخ سے دل کو غضب فشار ہوا پیچ و تاب میں چین جبیں کو دیکھ کے دل بستہ تر ہوا کیسی کشود کار کشاد نقاب میں ہم کچھ تو بد تھے جب نہ کیا یار نے پسند اے حسرت اس قدر غلطی انتخاب میں رہتے ہیں جمع کوچۂ جاناں میں خاص و عام آباد ایک گھر ہے جہان خراب میں آنکھ اس کی پھر گئی تھی دل اپنا بھی پھر گیا یہ اور انقلاب ہوا انقلاب میں بد نام میرے گریۂ رسوا سے ہو چکے اب عذر کیا رہا نگہ بے حجاب میں مطلب کی جستجو نے یہ کیا حال کر دیا حسرت بھی اب نہیں دل ناکامیاب میں گویا کہ رو رہا ہوں رقیبوں کی جان کو آتش زبانہ زن ہوئی طوفان آب میں ناکامیوں سے کام رہا عمر بھر ہمیں پیری میں یاس ہے جو ہوس تھی شباب میں ہے اختیار یار میں سود و زیاں مگر فاضل تھے ہم جہاں سے قضا کے حساب میں ناصح ہے عیب جو و دل آزار اس قدر گویا ثواب ہے سخن ناصواب میں دونوں کا ایک حال ہے یہ مدعا ہو کاش وہ ہی خط اس نے بھیج دیا کیوں جواب میں تقدیر بھی بری مری تقریر بھی بری بگڑے وہ پرسش سبب اجتناب میں کیا جلوے یاد آئے کہ اپنی خبر نہیں بے بادہ مست ہوں میں شب ماہتاب میں ہے منتوں کا وقت شکایت رہی رہی آئے تو ہیں منانے کو وہ پر عتاب میں تیری جفا نہ ہو تو ہے سب دشمنوں سے امن بدمست غیر محو دل اور بخت خواب میں پیہم سجود پائے صنم پر دم وداع مومنؔ خدا کو بھول گئے اضطراب میں

Jalta hun hijar-e-shaahid-o-yaad-e-sharaab mein Shauq-e-sawaab ne mujhe daala azaab mein Kehte hain tum ko hosh nahin iztiraab mein Saare gile tamaam hue ik jawaab mein Phaili shameem-e-yaar mere ashk-e-surkh se Dil ko ghazab fishaar hua pech-o-taab mein Chain-e-jabeen ko dekh ke dil-basta tar hua Kaisi kushood-e-kaar kushaad-e-niqaab mein Hum kuch to bad the jab na kiya yaar ne pasand Ae hasrat is qadar ghalati-e-intikhab mein Rehte hain jama koocha-e-jaanaan mein khaas-o-aam Aabaad ek ghar hai jahaan-e-kharaab mein Aankh us ki phir gayi thi dil apna bhi phir gaya Yeh aur inqilaab hua inqilaab mein Bad-naam mere girya-e-ruswa se ho chuke Ab uzr kya raha nigaah-e-be-hijaab mein Matlab ki justajoo ne yeh kya haal kar diya Hasrat bhi ab nahin dil-e-naakaamiyaab mein Goya ke ro raha hun raqeebon ki jaan ko Aatish-e-zabaana-zan hui toofaan-e-aab mein Nakamiyon se kaam raha umr bhar hamein Peeri mein yaas hai jo hawas thi shabaab mein Hai ikhtiyaar-e-yaar mein sood-o-zyaan magar Faazil the hum jahaan se qaza ke hisaab mein Naasih hai aib-jo-o-dil-aazaar is qadar Goya sawaab hai sukhan-e-naasawaab mein Donon ka ek haal hai yeh mudda ho kaash Woh hi khat us ne bhej diya kyun jawaab mein Taqdeer bhi buri meri taqreer bhi buri Bigre woh pursish-e-sabab-e-ijtinaab mein Kya jalwe yaad aaye ke apni khabar nahin Be-baada mast hun main shab-e-maahtaab mein Hai manaton ka waqt shikaayat rahi rahi Aaye to hain manaane ko woh par itaab mein Teri jafa na ho to hai sab dushmanon se amn Badmast ghair mahw-e-dil aur bakht-e-khwaab mein Paiham sujood-e-paa-e-sanam par dam-e-wadaa Momin Khuda ko bhool gaye iztiraab mein

چل پرے ہٹ مجھے نہ دکھلا منہ اے شب ہجر تیرا کالا منہ آرزوئے نظارہ تھی تو نے اتنی ہی بات پر چھپایا منہ دشمنوں سے بگڑ گئی تو بھی دیکھتے ہی مجھے بنایا منہ بات پوری بھی منہ سے نکلی نہیں آپ نے گالیوں پہ کھولا منہ ہو گیا راز عشق بے پردہ اس نے پردے سے جو نکالا منہ شب غم کا بیان کیا کیجئے ہے بڑی بات اور چھوٹا منہ جب کہا یار سے دکھا صورت ہنس کے بولا کہ دیکھو اپنا منہ کس کو خون جگر پلائے گا ساغر مے کو کیوں لگایا منہ پھر گئی آنکھ مثل قبلہ نما جس طرف اس صنم نے پھیرا منہ گھر میں بیٹھے تھے کچھ اداس سے وہ بولے بس دیکھتے ہی میرا منہ ہم بھی غمگین سے ہیں آج کہیں صبح اٹھے تھے دیکھ تیرا منہ سنگ اسود نہیں ہے چشم بتاں بوسہ مومنؔ طلب کرے کیا منہ

Chal pare hat mujhe na dikhla munh Ae shab-e-hijar tera kaala munh Aarzoo-e-nazaara thi to ne Itni hi baat par chhupaya munh Dushmanon se bigar gayi to bhi Dekhte hi mujhe banaya munh Baat poori bhi munh se nikli nahin Aap ne gaaliyon pe khola munh Ho gaya raaz-e-ishq be-parda Us ne parde se jo nikaala munh Shab-e-gham ka bayaan kya kijiye Hai bari baat aur chhota munh Jab kaha yaar se dikha soorat Hans ke bola ke dekho apna munh Kis ko khoon-e-jigar pilaaye ga Saaghar-e-mai ko kyun lagaya munh Phir gayi aankh misl-e-qibla-numa Jis taraf is sanam ne phera munh Ghar mein baithe the kuch udaas se woh Bole bas dekhte hi mera munh Hum bhi ghamgeen se hain aaj kahin Subah uthe the dekh tera munh Sang-e-aswad nahin hai chashm-e-butaan Bosa Momin talab kare kya munh

غصہ بیگانہ وار ہونا تھا بس یہی تجھ سے یار ہونا تھا کیا شب انتظار ہونا تھا ناحق امیدوار ہونا تھا کیوں نہ ہوتے عزیز غیر تمہیں میری قسمت میں خوار ہونا تھا مجھ سے جنت میں وہ صنم نہ ملا حشر اور ایک بار ہونا تھا گر نہ تھی اے دل اس کے رنج کی تعب کیوں شکایت گزار ہونا تھا خاک ہوتا نہ میں تو کیا کرتا اس کے در کا غبار ہونا تھا ہرزہ گردی سے ہم ذلیل ہوئے چرخ کا اعتبار ہونا تھا مرگ شام وصال حرماں ہے صبح دم جاں نثار ہونا تھا اور سے ہمکنار ہے دشمن آج تو ہمکنار ہونا تھا شکوۂ دہر پر کہا تم کو آفت روزگار ہونا تھا چشم بے اختیار جاناں میں کیا مرا اختیار ہونا تھا صبر کر صبر ہو چکا جو کچھ اے دل بے قرار ہونا تھا کوئے دشمن میں جا پکڑتا کیوں کیا مجھے شرمسار ہونا تھا وہ نمک پاش بھی نہیں ہوتے یوں ہی دل کو فگار ہونا تھا خاک میں حیف یہ شراب ملے محتسب بادہ خوار ہونا تھا نہ گیا تیر نالہ سوئے رقیب مرغ عرشی شکار ہونا تھا رات دن بادہ و صنم مومنؔ کچھ تو پرہیزگار ہونا تھا

Gussa begaana-waar hona tha Bas yahi tujh se yaar hona tha Kya shab-e-intizaar hona tha Naahaq umeedwaar hona tha Kyun na hote azeez ghair tumhein Meri qismat mein khwaar hona tha Mujh se jannat mein woh sanam na mila Hashr aur ek baar hona tha Gar na thi ae dil us ke ranj ki taab Kyun shikaayat-guzaar hona tha Khaak hota na main to kya karta Us ke dar ka ghubaar hona tha Harza-gardi se hum zaleel hue Charkh ka aitbaar hona tha Marg-e-shaam-e-wasl harmaan hai Subah-dam jaan-nisaar hona tha Aur se hamkinaar hai dushman Aaj to hamkinaar hona tha Shikwa-e-dahr par kaha tum ko Aafat-e-rozgaar hona tha Chashm-e-be-ikhtiyaar jaanaan mein Kya mera ikhtiyaar hona tha Sabr kar sabr ho chuka jo kuch Ae dil-e-be-qaraar hona tha Koo-e-dushman mein ja pakarta kyun Kya mujhe sharmisaar hona tha Woh namak-paash bhi nahin hote Yun hi dil ko figaar hona tha Khaak mein haif yeh sharaab mile Muhtasib baada-khwaar hona tha Na gaya teer naala soo-e-raqeeb Murgh-e-arshi shikaar hona tha Raat din baada-o-sanam Momin Kuch to parhezgaar hona tha

عدم میں رہتے تو شاد رہتے اسے بھی فکر ستم نہ ہوتا جو ہم نہ ہوتے تو دل نہ ہوتا جو دل نہ ہوتا تو غم نہ ہوتا ہوئی خجالت سے نفرت افزوں گلے کیے خوب آخریں دم وہ کاش اک دم ٹھہر کے آتے کہ میرے لب پر بھی دم نہ ہوتا پڑا ہی مرنا بس اب تو ہم کو جو اس نے خط پڑھ کے نامہ بر سے کہا کہ گر سچ یہ حال ہوتا تو دفتر اتنا رقم نہ ہوتا کسی کے جلنے کا دھیان آیا وگرنہ دود فغاں سے میرے اگر ہزاروں سپہر بنتے تمہاری آنکھوں میں نم نہ ہوتا جو آپ در سے اٹھا نہ دیتے کہیں نہ کرتا میں جبہہ سائی اگرچہ یہ سر نوشت میں تھا تمہارے سر کی قسم نہ ہوتا وصال کو ہم ترس رہے تھے جو اب ہوا تو مزا نہ پایا عدو کے مرنے کی جب خوشی تھی کہ اس کو رنج و الم نہ ہوتا جہان تنگ و ہجوم وحشت غرض کہ دم پر بری بنی تھی کہاں میں جاتا نہ جی ٹھہرتا کہیں جو دشت عدم نہ ہوتا مگر رقیبوں نے سر اٹھایا کہ یہ نہ ہوتا تو بے مروت نظر سے ظاہر حیا نہ ہوتی حیا سے گردن میں خم نہ ہوتا وہاں ترقی جمال کو ہے یہاں محبت ہے روز افزوں شریک زیبا تھا بوالہوس بھی جو بے وفائی میں کم نہ ہوتا غلط کہ صانع کو ہو گوارا خراش انگشت ہائے نازک جواب خط کی امید رکھتے جو قول جف القلم نہ ہوتا یہ بے تکلف پھرا رہی ہے کشش دل عاشقاں کی اس کو وگرنہ ایسی نزاکتوں پہ خرام ناز اک قدم نہ ہوتا وصال تو ہے کہاں میسر مگر خیال وصال ہی میں مزے اڑاتے ہوس نکلتی جو ساتھ انداز رم نہ ہوتا ہوا مسلماں میں اور ڈر سے نہ درس واعظ کو سن کے مومنؔ بنی تھی دوزخ بلا سے بنتی عذاب ہجر صنم نہ ہوتا

Adam mein rehte to shaad rehte use bhi fikr-e-sitam na hota Jo hum na hote to dil na hota jo dil na hota to gham na hota Hui khijalat se nafrat afzoon gale kiye khoob aakhireen dam Woh kaash ik dam thahar ke aate ke mere lab par bhi dam na hota Para hi marna bas ab to hum ko jo us ne khat parh ke naama-bar se Kaha ke gar sach yeh haal hota to daftar itna raqam na hota Kisi ke jalne ka dhyaan aaya warna dood-e-fughaan se mere Agar hazaron sipehr bante tumhari aankhon mein nam na hota Jo aap dar se utha na dete kahin na karta main jabha-saai Agarche yeh sarnavisht mein tha tumhare sar ki qasam na hota Wisaal ko hum taras rahe the jo ab hua to maza na paaya Adu ke marne ki jab khushi thi ke us ko ranj-o-alam na hota Jahaan tang-o-hijoom-e-wehshat gharaz ke dam par buri bani thi Kahan main jaata na ji theharta kahin jo dasht-e-adam na hota Magar raqeebon ne sar uthaya ke yeh na hota to be-murwwat Nazar se zaahir haya na hoti haya se gardan mein kham na hota Wahan taraqqi-e-jamaal ko hai yahan mohabbat hai roz-afzoon Shareek-e-zaiba tha bol-hawas bhi jo be-wafaai mein kam na hota Ghalat ke saani ko ho gawara kharaash-e-angusht-haye naazuk Jawaab-e-khat ki umeed rakhte jo qaul-e-jaffal-qalam na hota Yeh be-takalluf phira rahi hai kashish-e-dil-e-aashiqaan ki us ko Warna aisi naazukton pe khiraam-e-naaz ik qadam na hota Wisaal to hai kahan muyassar magar khayaal-e-wisaal hi mein Maze urate hawas nikalti jo saath andaaz-e-ram na hota Hua Musalman main aur dar se na dars-e-waiz ko sun ke Momin Bani thi dozakh bala se banti azaab-e-hijar-e-sanam na hota

غیروں پہ کھل نہ جائے کہیں راز دیکھنا میری طرف بھی غمزۂ غماز دیکھنا اڑتے ہی رنگ رخ مرا نظروں سے تھا نہاں اس مرغ پر شکستہ کی پرواز دیکھنا دشنام یار طبع حزیں پر گراں نہیں اے ہم نفس نزاکت آواز دیکھنا دیکھ اپنا حال زار منجم ہوا رقیب تھا سازگار طالع ناساز دیکھنا بد کام کا مآل برا ہے جزا کے دن حال سپہر تفرقہ انداز دیکھنا مت رکھیو گرد تارک عشاق پر قدم پامال ہو نہ جائے سرافراز دیکھنا میری نگاہ خیرہ دکھاتے ہیں غیر کو بے طاقتی پہ سرزنش ناز دیکھنا ترک صنم بھی کم نہیں سوز جحیم سے مومنؔ غم مآل کا آغاز دیکھنا

Ghairon pe khul na jaye kahin raaz dekhna Meri taraf bhi ghamza-e-ghammaz dekhna Udte hi rang-e-rukh mera nazron se tha nihan Is murgh-e-par-shikasta ki parwaaz dekhna Dushnaam-e-yaar tab-e-hazeen par giraan nahin Ae ham-nafas nazakat-e-aawaz dekhna Dekh apna haal-e-zaar munajjim hua raqeeb Tha saazgaar taali-e-naasaaz dekhna Bad kaam ka maal bura hai jaza ke din Haal-e-sipehr-e-tafarriqa andaaz dekhna Mat rakhiyo gard-e-taarik-e-ushshaaq par qadam Paamal ho na jaye sar afraaz dekhna Meri nigah-e-khaira dikhate hain ghair ko Be-taaqati pe sarzanish-e-naaz dekhna Tark-e-sanam bhi kam nahin soz-e-jaheem se Momin gham-e-maal ka aaghaz dekhna

اثر اس کو ذرا نہیں ہوتا رنج راحت فزا نہیں ہوتا بے وفا کہنے کی شکایت ہے تو بھی وعدہ وفا نہیں ہوتا ذکر اغیار سے ہوا معلوم حرف ناصح برا نہیں ہوتا کس کو ہے ذوق تلخ کامی لیک جنگ بن کچھ مزا نہیں ہوتا تم ہمارے کسی طرح نہ ہوئے ورنہ دنیا میں کیا نہیں ہوتا اس نے کیا جانے کیا کیا لے کر دل کسی کام کا نہیں ہوتا امتحاں کیجیے مرا جب تک شوق زور آزما نہیں ہوتا ایک دشمن کہ چرخ ہے نہ رہے تجھ سے یہ اے دعا نہیں ہوتا آہ طول امل ہے روز فزوں گرچہ اک مدعا نہیں ہوتا تم مرے پاس ہوتے ہو گویا جب کوئی دوسرا نہیں ہوتا حال دل یار کو لکھوں کیوں کر ہاتھ دل سے جدا نہیں ہوتا رحم کر خصم جان غیر نہ ہو سب کا دل ایک سا نہیں ہوتا دامن اس کا جو ہے دراز تو ہو دست عاشق رسا نہیں ہوتا چارۂ دل سوائے صبر نہیں سو تمہارے سوا نہیں ہوتا کیوں سنے عرض مضطر مومنؔ صنم آخر خدا نہیں ہوتا

Asar us ko zara nahi hota Ranj raahat fiza nahi hota Be-wafa kehne ki shikaayat hai Tu bhi waada-wafa nahi hota Zikr aghyaar se hua maaloom Harf-e-naasih bura nahi hota Kis ko hai zauq-e-talkh kaami laik Jang bin kuch maza nahi hota Tum hamaare kisi tarah na huay Warna duniya mein kya nahi hota Us ne kya jaane kya kiya le kar Dil kisi kaam ka nahi hota Imtihaan keejiye mera jab tak Shauq zoor-aazma nahi hota Ek dushman ke charkh hai na rahe Tujh se yeh ae duaa nahi hota Aah tool-e-amal hai roz-fizoon Garchay ik mudda'aa nahi hota Tum mere paas hote ho goya Jab koi doosra nahi hota Haal-e-dil yaar ko likhoon kyun kar Haath dil se juda nahi hota Reham kar khasm-e-jaan ghair na ho Sab ka dil ek sa nahi hota Daaman us ka jo hai daraaz to ho Dast-e-aashiq rasaa nahi hota Chaarah-e-dil sawaaye sabr nahi So tumhaare siwa nahi hota Kyun sune arz-e-muztar Momin Sanam aakhir khuda nahi hota

یوں نہ آنکھیں بدل مجھ سے میرے صنم میں ترے در سے اٹھ کر کہاں جاؤں گا تو اگر مجھ سے دامن بچاتا رہا سر ترے در سے ٹکرا کے مر جاؤں گا ہو چکی ہیں زمانے میں رسوائیاں اب نگاہیں چرانے سے کیا فائدہ تو بھلا دے مجھے اپنے دل سے مگر میں جہاں جاؤں گا تیرا کہلاؤں گا چاند تاروں سے نظریں ملائے ہوئے کاٹ دوں گا شب ہجر میں اس طرح جب بھی فرقت کے لمحے ستم ڈھائیں گے میں تری یاد سے دل کو بہلاؤں گا اپنے دل پہ سہوں گا محبت کے غم تجھ کو بدنام ہونے نہ دوں گا کبھی یہ مرا ظرف ہے یہ مری بات ہے تجھ پہ الزام آیا تو مر جاؤں گا تیری خاطر سلیقے سے سجدہ کروں ہے یہی آرزو ہے یہی جستجو مجھ کو مل جائے گر تیرا نقش قدم میں عبادت میں معراج پا جاؤں گا پیار تجھ سے کیا ہے خدا کی قسم یہ تعلق کبھی ٹوٹ سکتا نہیں اپنی ہستی مٹا کر ترے عشق میں تیرے جلووں کا آئینہ بن جاؤں گا آج تم کو مرے دل سے نسبت نہیں میں فناؔ ہوں ذرا تم بھی یہ سوچ لو کل اگر تم مجھے ڈھونڈنے آؤ گے میں ستاروں کی دنیا میں کھو جاؤں گا جذبۂ عشق میرا سلامت رہے موت آئے گی خود لے کے جام بقا اے فناؔ ان کی الفت میں ہو کے فناؔ ہر قدم پر نئی زندگی پاؤں گا

Yoon na aankhein badal mujh se mere sanam mein tare dar se uth kar kahaan jaaoon ga Tu agar mujh se daaman bachaata raha sar tare dar se takra ke mar jaaoon ga Ho chuki hain zamaane mein ruswaiyaan ab nigaahein churaane se kya faayeda Tu bhula de mujhe apne dil se magar mein jahaan jaaoon ga tera kehlaaoon ga Chaand taaron se nazrein milaaye huay kaat doon ga shab-e-hijr mein is tarah Jab bhi furqat ke lamhe sitam dhaayein ge mein teri yaad se dil ko behlaaoon ga Apne dil pe sahoon ga mohabbat ke gham tujh ko badnaam hone na doon ga kabhi Yeh mera zarf hai yeh meri baat hai tujh pe ilzaam aaya to mar jaaoon ga Teri khaatir saleeqe se sajda karoon hai yehi aarzoo hai yehi justaju Mujh ko mil jaaye gar tera naqsh-e-qadam mein ibaadat mein me'raaj paa jaaoon ga Pyaar tujh se kiya hai khuda ki qasam yeh ta'alluq kabhi toot sakta nahi Apni hasti mita kar tare ishq mein tere jalwon ka aaina ban jaaoon ga Aaj tum ko mere dil se nisbat nahi mein Fana hoon zara tum bhi yeh soch lo Kal agar tum mujhe dhoondne aao ge mein sitaaron ki duniya mein kho jaaoon ga Jazba-e-ishq mera salaamat rahe maut aaye gi khud le ke jaam-e-baqaa Ae Fana un ki ulfat mein ho ke Fana har qadam par nayi zindagi paaoon ga

تجھے ڈھونڈھتی ہیں نظریں مجھے اک جھلک دکھا جا مری زندگی کے مالک مری زندگی میں آ جا نہ غرض صنم کدے سے نہ حرم سے کوئی مطلب مجھے واسطہ ہے تجھ سے مرے دل میں تو سما جا تو بچھڑ گیا ہے جب سے مری نیند اڑ گئی ہے تری راہ تک رہا ہوں مرے چاند اب تو آ جا مجھے درد دے کے اپنا تو کہاں چھپا ہے جا کر مرا دل چرانے والے مجھے شکل تو دکھا جا ترا درد بن گیا ہے مری زندگی کا حاصل مرے دل پہ ہاتھ رکھ دے ذرا حوصلہ بڑھا جا مجھے آ کے دے سہارا یہ قدم نہ ڈگمگائیں کہیں میں بھٹک نہ جاؤں مجھے راستہ دکھا جا مرے نام کی نشانی نہ رہے جہاں میں باقی مری جان لینے والے مری قبر بھی مٹا جا ترے حسن پہ فدا ہوں ترے عشق میں فنا ہوں مجھے تیری آرزو ہے مری خلوتوں میں آ جا

Tujhe dhoondti hain nazrein mujhe ik jhalak dikha ja Meri zindagi ke maalik meri zindagi mein aa ja Na gharaz sanam-kade se na haram se koi matlab Mujhe waasta hai tujh se mere dil mein tu sama ja Tu bichhad gaya hai jab se meri neend udd gayi hai Teri raah tak raha hoon mere chaand ab tu aa ja Mujhe dard de ke apna tu kahaan chhipa hai jaa kar Mera dil churaane waale mujhe shakal to dikha ja Tera dard ban gaya hai meri zindagi ka haasil Mere dil pe haath rakh de zara hausla badha ja Mujhe aa ke de sahaara yeh qadam na dagmagayein Kahin mein bhatak na jaaoon mujhe raasta dikha ja Mere naam ki nishaani na rahe jahaan mein baaqi Meri jaan lene waale meri qabr bhi mita ja Tere husn pe fida hoon tere ishq mein Fana hoon Mujhe teri aarzoo hai meri khalwaton mein aa ja

دل بتوں پہ نثار کرتے ہیں کفر کو پائیدار کرتے ہیں جن کا مذہب صنم پرستی ہو کافری اختیار کرتے ہیں اس کا ایمان لوٹتے ہیں صنم جس کو اپنا شکار کرتے ہیں حوصلہ میرا آزمانے کو وہ ستم بار بار کرتے ہیں اس سے بڑھ کر نہیں نماز کوئی اپنی ہستی سے پیار کرتے ہیں اے فناؔ دل سنبھال کر رکھنا بت نگاہوں سے وار کرتے ہیں

Dil buton pe nisaar karte hain Kufra ko paayedaar karte hain Jin ka mazhab sanam parasti ho Kaafiri ikhtiyaar karte hain Us ka iimaan loot-te hain sanam Jis ko apna shikaar karte hain Hausla mera aazmaane ko Woh sitam baar baar karte hain Is se badh kar nahi namaaz koi Apni hasti se pyaar karte hain Ae Fana dil sambhaal kar rakhna But nigahon se waar karte hain

ہے وجہ کوئی خاص مری آنکھ جو نم ہے بس اتنا سمجھتا ہوں کہ یہ ان کا کرم ہے یہ عشق کی معراج ہے یا ان کا کرم ہے ہر وقت مرے سامنے تصویر صنم ہے کعبے سے تعلق ہے نہ بت خانے کا غم ہے حاصل مرے سجدوں کا ترا نقش قدم ہے دیوانوں پہ کس درجہ ترا لطف و کرم ہے بخشا ہے جو غم تو نے وہی حاصل غم ہے سر جب سے جھکایا ہے در یار پہ میں نے محراب خودی جلوہ گہہ شمع حرم ہے کیا کام زمانے سے اسے اے شہ خوباں تقدیر میں جس کی تری فرقت کا الم ہے کونین بدل جائے مگر تو نہ بدلنا تیرے ہی سبب اہل محبت کا بھرم ہے پلکوں پہ بکھرتے ہیں تری یاد کے موتی ہر اشک ندامت ترا انداز کرم ہے ظاہر میں کوئی کعبہ کوئی دیر و کلیسا باطن میں ہر اک چیز ترا نقش قدم ہے کر اپنی نظر سے مرے ایمان کا سودا اے دوست تجھے میری محبت کی قسم ہے یہ عمر گزر جائے مگر ہوش نہ آئے سر شوق عبادت میں در یار پہ خم ہے اے دوست ترے عشق میں پہنچا ہوں یہاں تک آنکھوں میں صنم خانہ ہے سینے میں حرم ہے کس طرح فناؔ چھوڑوں صنم خانۂ الفت حاصل مرے ایمان کا دیدار صنم ہے دنیا سے نرالی ہے فناؔ مقتل الفت اس مقتل الفت میں جو سر ہے وہ قلم ہے

Hai wajah koi khaas meri aankh jo nam hai Bas itna samajhta hoon ke yeh un ka karam hai Yeh ishq ki me'raaj hai ya un ka karam hai Har waqt mere saamne tasveer-e-sanam hai Kaabe se ta'alluq hai na but-khaane ka gham hai Haasil mere sajdon ka tera naqsh-e-qadam hai Deewanon pe kis darja tera lutf-o-karam hai Bakhsha hai jo gham tu ne wahi haasil-e-gham hai Sar jab se jhukaya hai dar-e-yaar pe main ne Mehraab-e-khudi jalwa-gah-e-shama-e-haram hai Kya kaam zamane se use ae shah-e-khooba(n) Taqdeer mein jis ki teri furqat ka alam hai Kounain badal jaaye magar tu na badalna Tere hi sabab ahl-e-mohabbat ka bharam hai Palkon pe bikharte hain teri yaad ke moti Har ashk-e-nadamat tera andaaz-e-karam hai Zaahir mein koi Kaaba koi dair-o-kaleesa Baatin mein har ik cheez tera naqsh-e-qadam hai Kar apni nazar se mere iimaan ka sauda Ae dost tujhe meri mohabbat ki qasam hai Yeh umr guzar jaaye magar hosh na aaye Sar shauq-e-ibadat mein dar-e-yaar pe kham hai Ae dost tere ishq mein pohancha hoon yahan tak Aankhon mein sanam-khana hai seene mein haram hai Kis tarah Fana chhoroon sanam-khana-e-ulfat Haasil mere iimaan ka deedaar-e-sanam hai Duniya se niraali hai Fana maqtal-e-ulfat Is maqtal-e-ulfat mein jo sar hai woh qalam hai

آنکھ اٹھی محبت نے انگڑائی لی دل کا سودا ہوا چاندنی رات میں ان کی نظروں نے کچھ ایسا جادو کیا لٹ گئے ہم تو پہلی ملاقات میں ساتھ اپنا وفا میں نہ چھوٹے کبھی پیار کی ڈور بندھ کر نہ ٹوٹے کبھی چھوٹ جائے زمانہ کوئی غم نہیں ہاتھ تیرا رہے بس مرے ہاتھ میں رت ہے برسات کی دیکھو ضد مت کرو رات اندھیری ہے بادل ہیں چھائے ہوئے رک بھی جاؤ صنم تم کو میری قسم اب کہاں جاؤ گے ایسی برسات میں ہے تیری یاد اس دل میں لپٹی ہوئی ہر گھڑی ہے تصور ترے حسن کا تیری الفت کا پہرہ لگا ہے صنم کون آئے گا میرے خیالات میں

Aankh uthi mohabbat ne angrai li, dil ka sauda hua chandni raat mein Un ki nazron ne kuch aisa jadoo kiya, lut gaye hum to pehli mulaqat mein Saath apna wafa mein na choote kabhi, pyaar ki dore bandh kar na toote kabhi Choot jaye zamana koi gham nahi, haath tera rahe bas mere haath mein Rut hai barsaat ki dekho zid mat karo, raat andheri hai baadal hain chaaye huay Ruk bhi jao sanam tum ko meri qasam, ab kahan jaoge aisi barsaat mein Hai teri yaad is dil mein lipti hui, har ghadi hai tasawwur tere husn ka Teri ulfat ka pehra laga hai sanam, kaun aayega mere khayaalat mein

ہے کہاں کا ارادہ تمہارا صنم کس کے دل کو اداؤں سے بہلاؤ گے سچ بتاؤ کہ اس چاندنی رات میں کس سے وعدہ کیا ہے کہاں جاؤ گے دیکھو اچھا نہیں یہ تمہارا چلن یہ جوانی کے دن اور یہ شوخیاں یوں نہ آیا کرو بال کھولے ہوئے ورنہ دنیا میں بدنام ہو جاؤ گے آج جاؤ نہ بے چین کر کے مجھے جان جاں دل دکھانا بری بات ہے ہم تڑپتے رہیں گے یہاں رات بھر تم تو آرام کی نیند سو جاؤ گے پاس آؤ تو تم کو لگائیں گلے مسکراتے ہو کیوں دور سے دیکھ کر یوں ہی گزرے اگر یہ جوانی کے دن ہم بھی پچھتائیں گے تم بھی پچھتاؤ گے بے وفا بے مروت ہے ان کی نظر یہ بدل جائیں گے زندگی لوٹ کر حسن والوں سے دل کو لگایا اگر اے فناؔ دیکھو بے موت مر جاؤ گے

Hai kahan ka irada tumhara sanam, kis ke dil ko adaaon se behlaoge Sach batao ke is chandni raat mein, kis se waada kiya hai kahan jaoge Dekho accha nahi hai tumhara chalan, yeh jawani ke din aur yeh shokhiyan Yoon na aaya karo baal khole huay, warna duniya mein badnaam ho jaoge Aaj jaoge na be-chain kar ke mujhe, jaan-e-jaan dil dukhana buri baat hai Hum tadapte rahenge yahan raat bhar, tum to aaraam ki neend so jaoge Paas aao to tum ko lagayein gale, muskuraate ho kyun door se dekh kar Yoon hi guzre agar yeh jawani ke din, hum bhi pachtayein ge tum bhi pachtaoge Be-wafa be-muruwat hai in ki nazar, yeh badal jayein ge zindagi loot kar Husn walon se dil ko lagaya agar, ae Fana dekhno be-maut mar jaoge