Ae Abr-e-Tar Tu Aur Kisi Samt Ko Baras

اے ابر تر تو اور کسی سمت کو برس

اس ملک میں ہماری ہے یہ چشم تر ہی بس

حرماں تو دیکھ پھول بکھیرے تھی کل صبا

اک برگ گل گرا نہ جہاں تھا مرا قفس

مژگاں بھی بہہ گئیں مرے رونے سے چشم کی

سیلاب موج مارے تو ٹھہرے ہے کوئی خس

مجنوں کا دل ہوں محمل لیلیٰ سے ہوں جدا

تنہا پھروں ہوں دشت میں جوں نالۂ جرس

اے گریہ اس کے دل میں اثر خوب ہی کیا

روتا ہوں جب میں سامنے اس کے تو دے ہے ہنس

اس کی زباں کے عہدے سے کیوں کر نکل سکوں

کہتا ہوں ایک میں تو سناتا ہے مجھ کو دس

حیراں ہوں میرؔ نزع میں اب کیا کروں بھلا

احوال دل بہت ہے مجھے فرصت اک نفس