Ghazal

Aalam mein koi dil ka talab gar na paya Is jins ka yaan hum ne khareedar na paya Haq dhoondne ka aap ko aata nahin warna Aalam hai sabhi yaar kahan yaar na paya Ghairon hi ke haathon mein rahe dast-e-nigareen Kab hum ne tere haath se aazar na paya Jaati hai nazar khas pe gah-e-chashm-e-pareedan Yaan hum ne par-e-kaah bhi be-kaar na paya Tasveer ke maanind lage dar hi se guzri Majlis mein teri hum ne kabhoo baar na paya Soorakh hai seene mein har ek shakhs ke tujh se Kis dil ke tarah teer-e-nigah paar na paya Marboot hain tujh se bhi yehi na-kas o na-ahl Is baagh mein hum ne gul-e-be-khaar na paya Dam baad-e-junoon mujh mein na mehsoos tha yaani Jaame mein mere yaaron ne ek taar na paya Aaina bhi hairat se muhabbat ki hue hum Par sair ho is shakhs ka deedaar na paya Woh kheench ke shamsheer-e-sitam reh gaya jo Mir Khoon reezi ka yaan koi sazawaar na paya

Nikle hai chashma jo koi josh-zanaa pani ka Yad-deh hai wo kasu chashm ki giryani ka Lutf agar ye hai butaan sandal-peshani ka Husn kya subh ke phir chehra-e-noorani ka Kufr kuch chahiye islam ki raunaq ke liye Husn-e-zunnar hai tasbeeh-e-sulaimani ka Dirhami haal ki hai saare mere deewan mein Sair kar tu bhi ye majmua parishani ka Jaan ghabrati hai andoh se tan mein kya kya Tang ahwaal hai is yusuf-e-zindani ka Khel larkon ka samajhte the mohabbat ke tayeen Hai bara haif hamein apni bhi nadani ka Wo bhi jaane ke lahu ro ke likha hai maktoob Hum ne sar-nama kiya kaghaz-afshani ka Us ka munh dekh raha hoon so wahi dekhoon hoon Naqsh ka sa hai samaan meri bhi hairani ka But-parasti ko to islam nahin kehte hain Moataqid kaun hai Mir aisi musalmani ka

Kya karoon sharh khasta jani ki Main ne mar mar ke zindagani ki Haal bad-guftani nahin mera Tum ne poocha to mehrbani ki Sub ko jaana hai yoon to par ae sabr Aati hai ik teri jawani ki Tishna lab mar gaye tere aashiq Na mili ek boond paani ki Bait-bahsi samajh ke kar bulbul Dhoom hai meri khush zabani ki Jis se khoi thi neend Mir ne kal Ibtida phir wahi kahani ki

Garcha kab dekhte ho par dekho Aarzoo hai ke tum idhar dekho Ishq kya kya hamein dikhata hai Aah tum bhi to ik nazar dekho Yun araq jalwa gar hai is munh par Jis tarah os phool par dekho Har kharaash-e-jabeen jaraahat hai Naakhun-e-shauq ka hunar dekho Thi hamein aarzoo-e-lab-e-khandan So ewaz is ke chashm-e-tar dekho Rang-e-rafta bhi dil ko kheenche hai Ek shab aur yaan sahar dekho Dil hua hai taraf muhabbat ka Khoon ke qatre ka jigar dekho Pahunche hain hum qareeb marne ke Yaani jaate hain door agar dekho Lutf mujh mein bhi hain hazaaron Mir Didani hoon jo soch kar dekho

Aam hukm-e-sharab karta hoon Muhtasib ko kabab karta hoon Tik to rah ae bana-e-hasti tu Tujh ko kaisa kharab karta hoon Bahs karta hoon ho ke abjad khwan Kis qadar be-hisab karta hoon Koi bujhti hai ye bharak mein abas Tishnagi par itab karta hoon Sar talak aab-e-tegh mein hoon gharq Ab taeen aab aab karta hoon Ji mein phirta hai Mir wo mere Jaagta hoon ke khwab karta hoon

Aao kabhoo to paas hamare bhi naaz se Karna sulook khoob hai ahl-e-niyaaz se Phirte ho kya darakhton ke saaye mein door door Kar lo muwafiqat kasoo be-barg-o-saaz se Hijraan mein us ke zindagi karna bhala na tha Kotahi jo na hoowe ye umr-e-daraaz se Maanind-e-subha uqde na dil ke kabhoo khule Jee apna kyun ke achte na roze namaz se Karta hai chheed chheed hamara jigar tamaam Wo dekhna tera mizha-e-neem-baaz se Dil par ho ikhtiyaar to hargiz na kariye ishq Parheiz kariye is marz-e-jaan-gudaaz se Aage bicha ke nata'a ko laate the tegh-o-tasht Karte the yaani khoon to ik imtiaz se Maane' hon kyun ke girya-e-khoonein ke ishq mein Hai rabt-e-khaas chashm ko afshaa-e-raaz se Shayed sharaab khane mein shab ko rahe the Mir Khele tha ek mugbacha mehr-e-namaz se

Ae dost koi mujh sa ruswa na hua hoga Dushman ke bhi dushman par aisa na hua hoga Ab ashq-e-hinayi se jo tar na kare mizhgan Wo tujh kaf-e-rangeen ka mara na hua hoga Tuk gor-e-ghariban ki kar sair ke duniya mein In zulm-raseedon par kya kya na hua hoga Be-nala o be-zari be-khastagi o khwari Imroz kabhi apna farda na hua hoga Hai qaida-e-kully yeh koo-e-mohabbat mein Dil gham jo hua hoga paida na hua hoga Is kohna kharabe mein aabadi na kar mun'im Yak shehr nahin yaan jo sehra na hua hoga Aankhon se teri hum ko hai chashm ke ab howe Jo fitna ke duniya mein barpa na hua hoga Juz martaba-e-kul ko hasil kare hai aakhir Yak qatrah na dekha jo darya na hua hoga Sad nishtar-e-mizhgan ke lagne se na nikla khoon Aage tujhe Mir aisa sauda na hua hoga

Ishq kya kya aafatein laata raha Aakhir ab doori mein jee jaata raha Mihr-o-mah gul phool sab the par hamein Chehra-e-chehra hi wo bhaata raha Dil hua kab ishq ki rah ka daleel Main to khud gum hi ise paata raha Munh dikhata barson wo khush-roo nahin Chaah ka yoon kab talak naata raha Kuchh na main samjha junoon-o-ishq mein Der naasih mujh ko samjhata raha Daagh tha jo sar pe mere shama saan Paon tak mujh ko wohi khaata raha Kaise kaise ruk gaye hain Mir ham Muddaton munh tak jigar aata raha

Gham us ko sari raat sunaya to kya hua Ya roz uth ke sar ko phiraya to kya hua In ne to mujh ko jhoote bhi poochha na ek baar Main ne ise hazar jataya to kya hua Khwahan nahin wo kyon hi main apni taraf se yoon Dil de ke us ke haath bika to kya hua Ab sa'ee kar sipehr ke mere muye gaye Us ka mizaj mihr pe aaya to kya hua Mat ranja kar kisi ko ke apne to aetiqad Dil dhaaye kar jo kaaba banaya to kya hua Main said-e-natawan bhi tujhe kya karoon ga yaad Zalim ik aur teer lagaya to kya hua Kya kya duayein maangi hain khalwat mein sheikh yoon Zahir jahan se haath uthaya to kya hua Wo fikr kar ke chaak-e-jigar pawe iltiyam Naasih jo tu ne jaama silaya to kya hua Jeete to Mir in ne mujhe daagh hi rakha Phir gor par chiragh jalaya to kya hua

Jis jagah daur-e-jaam hota hai Waan yeh aajiz mudam hota hai Ham to ik harf ke nahin ممنون Kaisa khat-o-payam hota hai Tegh na-kaamon pe na har dam kheench Ik karishme mein kaam hota hai Poochh mat aah aashiqon ki ma'aash Roz un ka bhi shaam hota hai Zakhm bin gham bin aur ghussa bin Apna khaana haraam hota hai Shaikh ki si hi shakal hai shaitan Jis pe shab ihtilaam hota hai Qatl ko main kaha to uth bola Aaj-kal subah-o-shaam hota hai Aakhir aaon ga naash par ab aah Ke yeh aashiq tamaam hota hai Mir sahib bhi us ke haan the par Jaise koi ghulaam hota hai

Yaar ne ham se be-adai ki Vasl ki raat mein larai ki Baal-o-par bhi gaye bahaar ke saath Ab tawaqqo nahin rihai ki Kulfat-e-ranj-e-ishq kam na hui Main dawa ki bahut shifai ki Turfa raftar ke hain rafta sab Dhoom hai us ki rah-girai ki Khanda-e-yaar se taraf ho kar Barq ne apni jag-hansai ki Kuchh murawwat na thi in aankhon mein Dekh kar kya yeh aashnai ki Vasl ke din ko kar-e-jan na khincha Shab na aakhir hui judai ki Munh lagaya na dukhtar-e-raz ko Main jawani mein parsai ki Jawr is sang-dil ke sab na khinche Umar ne sakht be-wafai ki Koh-kan kya pahar tore ga Eshq ne zor-azmai ki Chupke us ki gali mein phirte rahe Der waan ham ne be-navai ki Ik nigah mein hazar jee maare Sahiri ki ke dil-rabai ki Nisbat is aastan se kuchh na hui Barson tak ham ne jibha-sai ki Mir ki bandagi mein jaan-baazi Sair si ho gayi khudai ki

Ghalib ke yeh dil-e-khasta shab-e-hijr mein mar jaye Yeh raat nahin woh jo kahani mein guzar jaye Hai turfa mufattin nigah is aaina-roo ki Ik pal mein kare sainkron khoon aur mukar jaye Ne but-kada hai manzil-e-maqsood na Kaaba Jo koi talashi ho tera aah kidhar jaye Har subah to khursheed tare munh pe chadhe hai Aisa na ho yeh saada kahin jee se utar jaye Yaqoot koi un ko kahe hai koi gulbarg Tik hont hila tu bhi ke ik baat thahar jaye Hum taza shaheedon ko na aa dekhne nazan Daman ki teri zeh kahin lohu mein na bhar jaye Giriye ko mere dekh tik ik shahr ke bahar Ik sathah hai paani ka jahan tak ke nazar jaye Mat baith bahut ishq ke aazurda dilon mein Nala kasu mazloom ka taseer na kar jaye Is varte se takhta jo koi pahuche kinare To Mir watan mere bhi shayad yeh khabar jaye

Shab dard-o-gham se arsa mere ji pe tang tha Aaya shab-e-firaaq thi ya roz-e-jang tha Kasrat mein dard-o-gham ki na nikli koi tapish Koocha-e-jigar ke zakhm ka shaayad ke tang tha Laaya mere mazaar pe us ko yeh jazb-e-ishq Jis be-wafa ko naam se bhi mere nang tha Dekha hai said-gaah mein tere said ka jigar Baa-aanke chhan raha tha pe zauq-e-khadang tha Dil se mere laga na tera dil hazaar haif Yeh shesha ek umr se mushtaaq-e-sang tha Mat kar ajab jo Meer tere gham mein mar gaya Jeene ka is mareez ke koi bhi dhang tha

Chhutta hi nahin ho jise aazaar-e-mohabbat Maayoos hun main bhi ke hun beemaar-e-mohabbat Imkaan nahin jeete ji ho is qaid se aazaad Mar jaaye tabhi chhutte griftaar-e-mohabbat Taqseer na khoobaan ki na jallaad ka kuch jurm Tha dushman-e-jaani mera iqraar-e-mohabbat Har jins ke khwaahaan mile baazaar-e-jahaan mein Lekin na mila koi khareedar-e-mohabbat Is raaz ko rakh ji hi mein ta ji bache tera Zinhaar jo karta ho to izhaar-e-mohabbat Har naqsh-e-qadam par tere sar bece hain aashiq Tuk sair to kar aaj to baazaar-e-mohabbat Kuch mast hain hum deeda-e-pur-khoon-e-jigar se Aaya yahi hai saaghar-e-sarshaar-e-mohabbat Beekaar na reh ishq mein tu rone se hargiz Yeh girya hi hai aab-e-rukh-kaar-e-mohabbat Mujh sa hi ho Majnoon bhi yeh kab maane hai aaqil Har sar nahin ae Meer sazaawaar-e-mohabbat

Jafaaen dekh liyaan be-wafaaiyaan dekheen Bhala hua ke teri sab buraaiyaan dekheen Teri gali se sada ae kashanda-e-aalam Hazaaron aati hui chaarpaaiyan dekheen Gaya nazar se jo woh garm-tifl-e-aatish-baaz Hum apne chehre pe urti hawaaiyaan dekheen Tere wisaal ke hum shauq mein hun aawara Azeez dost sabbon ki judaaiyan dekheen Hamesha maa'il aaina hi tujhe paaya Jo dekheen hum ne yahi khud-numaaiyaan dekheen Shahaan ke kohl-e-jawaahir thi khaak-e-pa jin ki Unhi ki aankhon mein phirte salaaiyan dekheen Bani na apni to is jang-jo se hargiz Meer Laraaiyen jab se hum aankhen laraaiyan dekheen

Aage jamaal-e-yaar ke mazoor ho gaya Gul ik chaman mein deeda-e-be-noor ho gaya Ik chashm-e-muntazir hai ke dekhe hai kab se raah Jyon zakhm teri doori mein naasoor ho gaya Qismat to dekh sheikh ko jab lahar aayi tab Darwaaza sheerha-khaane ka mamoor ho gaya Pahuncha qareeb-e-marg ke woh said-e-naaqabool Jo teri said-gaah se tuk door ho gaya Dekha yeh naao-nosh ke naish-e-firaaq se Seena tamaam khaana-e-zanboor ho gaya Is maah-e-chaardah ka chhupe ishq kyunke aah Ab to tamaam shehr mein mashhoor ho gaya Shaayad kiso ke dil ko lagi is gali mein chot Meri baghal mein shesha-e-dil choor ho gaya Laasha mera tasalli na zir-e-zameen hua Jab tak na aan kar woh sar-e-goor ho gaya Dekha jo main ne yaar to woh Meer hi nahin Tere gham-e-firaaq mein ranjoor ho gaya

Dekhe ga jo tujh-ru ko so hairaan rahe ga Waabasta tere mo ka pareshaan rahe ga Waada to kiya us se dam-e-subh ka lekin Us dam taen mujh mein bhi agar jaan rahe ga Munim ne bana zulm ki rakh ghar to banaaya Par aap koi raat hi mehmaan rahe ga Chhuton kahin eeza se laga ek hi jallaad Ta-hashr mere sar pe yeh ahsaan rahe ga Chamte rahen ge dasht-e-mohabbat mein sar-o-tegh Mahshar taen khaali na yeh maidaan rahe ga Jaane ka nahin shor-e-sukhan ka mere hargiz Ta-hashr jahaan mein mera deewaan rahe ga Dil dene ki aisi harkat un ne nahin ki Jab tak jiye ga Meer pashemaan rahe ga

Hum hain majrooh maajra hai yeh Woh namak chhidke hai maza hai yeh Aag the ibtida-e-ishq mein hum Ab jo hain khaak intiha hai yeh Bood-e-aadam namood-e-shabnam hai Ek do dam mein phir hawa hai yeh Shukr us ki jafa ka ho na saka Dil se apne hamein gila hai yeh Shor se apne hashr hai parda Yun nahin jaanta ke kya hai yeh Bas hua naaz ho chuka ighmaaz Har ghadi hum se kya ada hai yeh Naashen uthti hain aaj yaaron ki Aan baitho to khush-numa hai yeh Dekh be-dam mujhe laga kehne Hai tu murda sa par bala hai yeh Main to chup hun woh hont chaate hai Kya kahun reejhne ki ja hai yeh Hai re be-gaanagi kabhu un ne Na kaha yeh ke aashna hai yeh Tegh par haath dam-ba-dam kab tak Ik laga chak ke mudda hai yeh Meer ko kyun na mughatanam jaane Agle logon mein ik raha hai yeh

Kya moaafiq ho dawa ishq ke beemaar ke saath Ji hi jaate nazar aaye hain is aazaar ke saath Raat majlis mein teri hum bhi khare the chupke Jaise tasweer laga de koi deewaar ke saath Mar gaye par bhi khuli reh gayin aankhen apni Kaun is tarah mua hasrat-e-deedaar ke saath Shauq ka kaam khicha door ke ab mehr-misaal Chashm-e-mushtaaq lagi jaaye hai tumaar ke saath Raah is shokh ki aashiq se nahin ruk sakti Jaan jaati hai chali khoob-e-raftaar ke saath We din ab saalte hain raaton ko barson guzre Jin dinon deer raha karte the hum yaar ke saath Zikr-e-gul kya hai saba ab ke khizaan mein hum ne Dil ko naachaar lagaaya hai khas-o-khaar ke saath Kis ko har dam hai lahoo rone ka hijraan mein dimaagh Dil ko ik rabt sa hai deeda-e-khoon-baar ke saath Meri is shokh se sohbat hai baainahu waisi Jaise ban jaaye kiso saade ko ayyaar ke saath Dekhiye kis ko shahadat se sar-afraaz karen Laag to sab ko hai is shokh ki talwaar ke saath Bekali us ki na zaahir thi jo tu ae bulbul Dam-kash Meer hui is lab-o-guftaar ke saath

Dard-o-andoh mein thahra jo raha main hi hun Rang-e-ru jis ke kabhu munh na charha main hi hun Jis pe karte ho sada jor-o-jafa main hi hun Phir bhi jis ko hai gumaan tum se wafa main hi hun Bad kaha main ne raqeebon ko to taqseer hui Kyun hai bakhsho bhi bhala sab mein bura main hi hun Apne koohe mein fughaan jis ki suno ho har raat Woh jigar-sokhta-o-seena-jala main hi hun Khaar ko jin ne ladi moti ki kar dikhlaaya Is bayaabaan mein woh aabla-pa main hi hun Lutf aane ka hai kya bas nahin ab taab-e-jafa Itna aalam hai bhara jaao na kya main hi hun Ruk ke ji ek jahaan doosre aalam ko gaya Tan-tanha na tere gham mein hua main hi hun Is ada ko to tuk ik sair kar insaaf karo Woh bura hai ga bhala dosto ya main hi hun Main yeh kehta tha ke dil jin ne liya kaun hai woh Yak-baik bol utha us taraf aa main hi hun Jab kaha main ne ke tu hi hai to phir kehne laga Kya kare ga tu mera dekhon to ja main hi hun Sunte hi hans ke tuk ik sochyo kya tu hi tha Jin ne shab ro ke sab ahwaal kaha main hi hun Meer aawara-e-aalam jo suna hai tu ne Khaak-aaluda woh ae baad-e-saba main hi hun Kaasa-e-sar ko liye maangta deedaar phire Meer woh jaan se bezaar gada main hi hun