Yeh Tark Ho Ke Khashan Kaj Agar Kulah Karein

یہ ترک ہو کے خشن کج اگر کلاہ کریں

تو بوالہوس نہ کبھو چشم کو سیاہ کریں

تمہیں بھی چاہیے ہے کچھ تو پاس چاہت کا

ہم اپنی اور سے یوں کب تلک نباہ کریں

رکھا ہے اپنے تئیں روک روک کر ورنہ

سیاہ کر دیں زمانے کو ہم جو آہ کریں

جو اس کی اور کو جانا ملے تو ہم بھی ضعیف

ہزار سجدے ہر اک گام سربراہ کریں

ہوائے مے کدہ یہ ہے تو فوت وقت ہے ظلم

نماز چھوڑ دیں اب کوئی دن گناہ کریں

ہمیشہ کون تکلف ہے خوب رویوں کا

گزار ناز سے ایدھر بھی گاہ گاہ کریں

اگر اٹھیں گے اسی حال سے تو کہیو تو

جو روز حشر تجھی کو نہ عذر خواہ کریں

بری بلا ہیں ستم کشتۂ محبت ہم

جو تیغ برسے تو سر کو نہ کچھ پناہ کریں

اگرچہ سہل ہیں پر دیدنی ہیں ہم بھی میرؔ

ادھر کو یار تأمل سے گر نگاہ کریں