Kuch Karo Fikr Mujh Diwaane Ki

کچھ کرو فکر مجھ دوانے کی

دھوم ہے پھر بہار آنے کی

دل کا اس کنج لب سے دے ہے نشاں

بات لگتی تو ہے ٹھکانے کی

وہ جو پھرتا ہے مجھ سے دور ہی دور

ہے یہ تقریب جی کے جانے کی

تیز یوں ہی نہ تھی شب آتش شوق

تھی خبر گرم اس کے آنے کی

خضر اس خط سبز پر تو موا

دھن ہے اب اپنے زہر کھانے کی

دل صد چاک باب زلف ہے لیک

باؤ سی بندھ رہی ہے شانے کی

کسو کم ظرف نے لگائی آہ

تجھ سے مے خانے کے جلانے کی

ورنہ اے شیخ شہر واجب تھی

جام داری شراب خانے کی

جو ہے سو پائمال غم ہے میرؔ

چال بے ڈول ہے زمانے کی