Dil Pahuncha Halaki Ko Nipat Kheench Kasala

دل پہنچا ہلاکی کو نپٹ کھینچ کسالا

لے یار مرے سلمہ اللہ تعالی

کچھ میں نہیں اس دل کی پریشانی کا باعث

برہم ہی مرے ہاتھ لگا تھا یہ رسالا

معمور شرابوں سے کبابوں سے ہے سب دیر

مسجد میں ہے کیا شیخ پیالہ نہ نوالا

گزرے ہے لہو واں سر ہر خار سے اب تک

جس دشت میں پھوٹا ہے مرے پاؤں کا چھالا

گر قصد ادھر کا ہے تو ٹک دیکھ کے آنا

یہ دیر ہے زہاد نہ ہو خانۂ خالا

جس گھر میں ترے جلوے سے ہو چاندنی کا فرش

واں چادر مہتاب ہے مکڑی کا سا جالا

دشمن نہ کدورت سے مرے سامنے ہو جو

تلوار کے لڑنے کو مرے کیجو حوالہ

ناموس مجھے صافی طینت کی ہے ورنہ

رستم نے مری تیغ کا حملہ نہ سنبھالا

دیکھے ہے مجھے دیدۂ پر خشم سے وہ میرؔ

میرے ہی نصیبوں میں تھا یہ زہر کا پیالا